Мова…
Родная мова
У марах, у песнях, у снах.
Мае ў ёй кожнае слова
Свой колер, і смак, і пах.
Анатоль Грачанікаў
16 лютага ў дзяржаўнай ўстанове адукацыі “Гімназія № 1 г. Слоніма” пачалася дэкада беларускай мовы і літаратуры. З самага ранку прагучаў інформ-дайджэст “Дэкада пачынаецца”. У гэты святочны дзень нікога не пакінула без увагі школьная акцыя “Вобразы-сімвалы Беларусі”.
Шаркота В.М. для вучняў і настаўнікаў гімназіі ў бібліятэцы аформіла выставу “З любоўю да роднага слова”.
У рамках дэкады праходзяць цікавыя мерапрыемствы: конкурс “Буслік-2022”, акцыя “Рускай мове дай разгрузку – размаўляй па беларуску”, інтэлектуальная гульня “Пуцявінамі мовы”, конкурс “ФЭСТ”, інтэлектуальнае спаборніцтва “БелаВеды”.
21 лютага – Міжнародны дзень роднай мовы ў нашай гімназіі заўсёды вызначаецца святочнасцю і незвычайнасцю. І гэты навучальны год не стаў выключэннем. 21 лютага прагучаў інформ-дайджэст “Дзень роднай мовы” для вучняў 5-11класаў. Акцыя “Напішам дыктант разам” таксама не прайшла без увагі: вучні, настаўнікі напісалі разам дыктант “Музей паэта”. А самым значным мерапрыемствам, якім завяршаўся Міжнародны дзень роднай мовы, стала шоу-дэгустацыя страў нацыянальнай беларускай кухні “Гісторыя Беларусі на смак”. У дэгустацыі прынялі ўдзел не толькі вучні, але і бацькі, настаўнікі.
Родная мова, цудоўная мова!
Ты нашых думак уток і аснова!
Матчын дарунак ад самай калыскі,
Ты самацветаў яскравая нізка…
Гэтак цудоўна сказаў пра нашу мову Уладзімір Дубоўка. Без нашай мовы не было б і нас, беларусаў, як нацыі, без яе не адбылася б і сённяшняя віктарына.
У віктарыне ўдзельнічалі 2 каманды, якія выправіліся ў незвычайнае, віртуальнае падарожжа па Беларусі. Не выходзячы з класа, усе прысутныя змаглі павандраваць па розных старонках культуры, гісторыі і мовы Беларусі, а заадно і пабачылі, наколькі добра ўдзельнікі віктарыны ведаюць родную краіну. Пытанні і заданні падарожжа датычыліся самых разнастайных бакоў жыцця Беларусі: яе мовы, літаратуры, этнаграфіі, гісторыі.
Гульня суправаджалася смехам і жартамі, дзеці плячо ў плячо імкнуліся да перамогі. Усе ўдзельнікі атрымалі прызы.
Завяршылася дэкада беларускай мовы і літаратуры флэшмобам “Мы разам”. Вучні 5-11 класаў падзяліліся сваім цяплом, пяшчотай, дабрынёй, любоўю з ўсімі намі, дарослымі. А мы з ўдзячнасцю ўсё гэта возьмем і паспрабуем зберагчы для нашага мірнага будучага.